نجـمــة زهــري

محلاكــم يانجوم يامونسين القمر

و يامصابح اللّيل نحكيلكم سرّي

يبان زينكــم في الظّلام هذا شّيء يحيّر

تحجبو على النّاس ترحلو الصّباح بكري

كلّ النّجوم واقفين في رحمة وستر

غير نجمة زهري اللّي راحت تجري

كــرهت من مكانها حبّت تسافر

قالت عندي زين وسلاحي صغري

يانجمة اهداي راه قريب الفجر

وين رايحة في الظّلام بالاك تتبحري

راه قلبي يهواك وراه السّفر واعر

ابقاي معايا نديرك في بصري

درتك فوق ريسان قادات العسكر

في تاج الملوك وهذي من بكري

درتك فوق لعلام فرح ولاّ يفرفر

فوق قبّة لقصور وعطيتك عمري

عزّيتك كثير ودرتك في المنبر

ومكانك بعدما نموت في شواهد قبري

ابقاي معيا راه ربّي قادر

يجمعنا في الخير والهنا وشكون يدري

قالتلي قريت عند واحد الشّاعر

أبيات على الزّهو وأنا ضاق خاطري

كلامو كان ساهل بلا مايفسّر

اقنعني وقرّرت نجرّب زهري

يانجمة اصبري راه مليح الصّبر

مكانش كي السّترة اللّي مدحك غرّي

قالتلي المكتوب كلّ شيء مقدّر

وزيد النّجوم كاينين شوف واحدة غيري

اللّي كان بيناتنا خلاص نعاودو من الآخر

أنت شوف مادير وأنا نعوم بحري

وين درتي حبيبك في صفحة القدر

ضحكت وقالت حبيبي في حجري

تمّ بدى الدمّار ودرت يدي على الصدر

ومن كثرة الخبّاط خرج قلبي من ظهري

جازيتيني بالنّكر ياشهدة الغدر

لكنّي واقف بقدرة الباريء

الدّفلة مرّة أنا عندي سكر

من كثرة المرار اللّي ذقتو من صغري

ماردموني جبال ماكلاني البحر

كلّي شيء غبار نفضتو من شعري

أنا الشّعر ماقريتش لكنّي نهدر

نقول واش نحسّ نوزن بعباري

اللّي قرّاك الزّهو ردّيتيه شاطر

ماهوش هو العالم أنتي اللّي دراري

شيخ شعرو غامل مصدد بينو وبين البهيم الفرق شوالي

يردّ عليّا إذا كان شاطر نشبّعو قافية مشكلة بيباري

ماتروحيش لبعيد ياشهدة الغدر

تزغدي شوية من بعد تغبري

أنا قلبي نيّة أنتي قلبك حجر

تبقى بيناتنا وتعياي تتفكري

نختم كلامي بالمسك والعنبر

والصّلاة على لحبيب ريحة النّواري

الصحابة الكرام عمر وبوبكر

نذكر آسمهم ونوّر داري

أوعابد اختم شهّد واستغفر

وابعث سلاموا اللّي فالهوى قاري

كمال مسعودي بأوتارو حاضر

(الله يرحمك ياكمال)

ومازالهم الإثنين شايدين في الباريء

محلاكــم يانجوم يامونسين القمر

و يامصابح اللّيل نحكيلكم سرّي

يبان زينكــم في الظّلام هذا شّيء يحيّر

تحجبو على النّاس ترحلو الصّباح بكري

كلّ النّجوم واقفين في رحمة وستر

غير نجمة زهري اللّي راحت تجري